Spákonuhof

Spákonuhof verður opnað á Skagaströnd opnað sumarið 2011. Það er sýning um Þórdísi spákonu, fyrsta nafngreinda íbúa Skagastrandar en hún var uppi á síðari hluta 10. aldar. Að auki verður í Spákonuhofi margháttaður fróðleikur um spádóma og spáaðferðir.

Gestir geta látið spá fyrir sér eða fengið lófalestur. Börnin fá aðskoða í gullkisturÞórdísar, Þar sem ýmislegt leynist.


Menningarfélagið Spákonuarfur

Spákonuarfur hefur frá árinu 2007 unnið að ýmsum verkefnum, á sviði menningar og sögu, sem tengjast Skagaströnd. Mörg þeirra verkefna tengjast Þórdísi spákonu en hún er fyrsta nafngreinda persónan sem vitað er að hafi átt heima á Skagaströnd, nánar tiltekið á bænum Spákonufelli.

Þórdís var uppi á síðari hluta 10. aldar. Nafn hennar kemur víða fyrir í frásögnum fyrri tíma, bæði lof og last. Hún var þekkt fyrir að vera kvenskörungur mikill og standa jafnfætis helstu höfðingjum. Einnig var hún forspá og fjölkunnug. Þá fóstraði hún Þorvald víðförla, fyrsta kristniboðann á Íslandi.

Í þjóðsögum er sagt frá gullkistu Þórdísar sem hún faldi í Spákonufelli, fjallinu fyrir ofan bæinn (639 m) og er þar væntanlega enn enda ekki á allra færi að nálgast hana eftir því sem sagt er í sögunni.

Önnur þekkt kennileiti á Skagaströnd sem eru kennd við spákonuna eru Spákonufellshöfði og Spákonufellsey.

Menningarfélagið Spákonuarfur hefur m.a. staðið að ritun á sögu Þórdísar og uppsetningu leikrits byggðu á fyrrnefndri sögu. Þórdísargöngur á Spákonufell eru farnar tvisvar á hverju sumri. Boðið er upp á leiðsögn og meðal annars er sagt frá sögu Þórdísar.

Gerð hefur verið afsteypa af Þórdísi spákonu í fullri líkamsstærð í samstarfi við leikmunagerð Sögusafnsins í Perlunni.



Spákonuhofið opnaði sumarið 2011. Halldór Árni sem nú vinnur að heimildarmynd um Skagaströnd var á staðnum og kvikmyndaði opnunina.