Mynd vikunnar

Ísberg Ís Í bókinni: Sjósókn frá Skagaströnd & Vélbátaskrá 1908-2010, eftir Lárus Ægi Guðmundsson segir svo um þetta skip: " Ísberg. Þetta var 350 tonna flutningaskip sem keypt var frá Noregi 1983 og var í eigu félagsins Ok h/f en í því átti Skagstrendingur h/f um fjórðungshlut. Skipið sökk í fyrstu ferð sinni en mannbjörg varð". Myndina tók Árni Geir Ingvarsson þegar verið var að lesta skipið í Skagastrandarhöfn fyrir síðustu för þess. Dagblaðið DV sagði frá sjóslysinu á eftirfarandi hátt 2. maí 1983: "Mannbjörg varð er nýasta skip íslenska kaupskipaflotans, Isberg IS, sökk eftir árekstur um 70 sjómílur austur af Grimsby síðdegis á laugardag." Atburðurinn átti sér stað um klukkan 4 að íslenskum tíma. Þýskt flutningaskip, Tilla, keyrði inn í Isberg á miðju skipi bakborðsmegin. Isberg fór á hliðina á nokkrum mínútum og var sokkið eftir tæpa klukkustund. Skipverjarnir fimm komust í björgunarbát og var bjargað upp í þýska skipið, sem var tiltölulega lítið laskað. Skipverjar voru fluttir til Grimsby og komu síðan til landsins í nótt. Skipstjóri á Isberg var Jón Steinar Árnason. Að hans sögn var mikil þoka yfir þegar atburðurinn átti sér stað og skyggni aðeins um 300 metrar. Áreksturinn gerðist mjög snöggt, en skipstjóri Isbergs hafði þó séð hvað verða vildi. „Við vorum byrjaðir að beygja og reyna að forða okkur og síðan stoppuðum við og gáfum þokumerki. Eg prófaði að kalla til þeirra á örbylgjustöð en það gekk ekkert og næsta skref var bara að forða sér því skipið var oltið. Það lagðist á hliðina á 3 til 5 mínútum enda fór þýska skipið alla leið inn í lest," sagði skipstjórinn, er DV ræddi við hann við heimkomuna í nótt. Isberg er 360 tonna frystiskip sem var keypt frá Noregi og kom fyrst til landsins fyrir tíu dögum. Það var byggt árið 1972 og því 11 ára gamalt. Eigandi þess var OK h/f á Isafirði. Þetta var fyrsta ferð þess frá Islandi. Skipið var á leiðinni frá Grimsby til Cuxhaven með um 200 tonn af frystum fiski er áreksturinn varð. Tilla, sem er um 1000 tonna skip, var hins vegar á leiðinni frá Þýskalandi til Bretlands. ÓEF

Opið Hús @ Nes Listamiðstöð

Opið Hús @ Nes Listamiðstöð Opið Hús @ Nes Listamiðstöð View this email in your browser Komdu í kaffi og hitta óktober listamennina okkar ! Laugardagur 29th kl 16.00 - 18.00

A L Þ I N G I S K O S N I N G A R N A R 29. október 2016

AUGLÝSING UM KJÖRFUND Kjörfundur í Sveitarfélaginu Skagaströnd vegna kosninga til Alþingis þann 29. október 2016 fer fram í Fellsborg þann dag og hefst kl. 10.00 og lýkur kl. 22.00 Kjörstjórnin

Mikil löndun á Skagastrandarhöfn

  Undanfarna daga hefur verið mikið um að vera á höfninni á Skagaströnd. Laugardaginn 22. október og sunnudaginn 23. október var landað um 170 tonnum úr 11 bátum. Mánudaginn 24. október lönduðu 16 bátar um 169 tonnum. Skagastrandarhöfn er nú með facebook síðu þar sem hægt er að fylgjast með hafnarlífinu á Skagaströnd. https://www.facebook.com/skagastrandarhofn.skagastrond.5?fref=nf&pnref=story

Mynd vikunnar

Spákonufellsrétt 1969. Réttastörf í Spákonufellsrétt 1969. Fólkið á myndinni er, frá vinstri: Jóhannes Hinriksson (d.27.10.1973) Ásholti, Lárus Árnason (d. 21.5.2011) Ási, Anna Bára Sigurjónsdóttir Sunnuhlíð og Kári Lárusson Ási. Á þessum tíma var mjög algengt að menn á Skagaströnd ættu nokkrar kindur og er talið að þá hafi verið allt að 3000 fjár í eigu Skagstrendinga og starfandi var Sauðfjárræktarfélag Skagstrendinga. Í dag (2016) má ætla að kindurnar séu milli 20 og 40. Ef grannt er skoðað má sjá skátaskálann upp í hlíð Spákonufells. Skálann ber yfir höfuð Önnu Báru. Skálann byggðu skátarnir á Skagaströnd en hann stóð einungis í nokkur ár því hann sligaðist að lokum undan snjó og eyðilagðist.

Endurnýjun vatnslagna mánudaginn 24.okt

Eftir hádegi mánudaginn 24.okt verður vatnslaust í efri hluta Bogabrautar, Hólabrautar og Fellsbrautar. Unnið verður að endurnýjun vatnslaga og getur verkið tekið hátt í 4 tíma.

Veðurfræði og útivist

 Einar Sveinbjörnsson, veðurfræðingur, verður með námskeið um Veðurfræði og útivist í Samstöðusalnum á Þverbraut 1 á Blönduósi miðvikudaginn 26. október kl 18:00 - 22:00 Kennd verða áhrif fjalla og landslags á veður, einkum vinda, úrkomu og skýjafars. Farið er í megineinkenni veðurfars á Íslandi á öllum árstímum, hvernig hiti og vindur breytist með hæð. Þá er fjallað um jöklaveðráttu, skafrenning og megingerðir þoku. Leiðbeiningar eru gefnar um aðgengilegar veðurspár, hverjar gagnast vel og hverjar síður fyrir ferðalanga í misjöfnu veðri. Ath: Samstaða, SFR og Kjölur greiðanámskeiðið fyrir sína félagsmenn Skráning á farskolinn@farskolinn.is  eða í síma 455 6010    

Starfsmaður óskast

  Starfsmaður óskast til að annast heimilsjálp hjá eldri borgurum og öryrkjum á Skagaströnd.   Um er að ræða hlutastarf sem getur tekið breytingum eftir fjölda þjónustuþega.     Viðkomandi þarf að geta hafið störf sem fyrst.   Upplýsingar veittar á skrifstofu Sveitarfélagsins Skagastrandar í síma 455 2700   Sveitarstjóri  

Matarsmiðja hjá BioPol ehf á Skagaströnd

BioPol ehf á Skagaströnd hefur nú auglýst eftir matvælafræðingi til þess að hafa umsjón með matarsmiðju sem mun rísa í tengslum við rannsóknastofu félagsins. Hlutverk matvælafræðingsins verður fyrst og fremst að veita nauðynlega sérfræðiráðgjöf og aðstoða frumvöðla við að þróa vörur sínar í markaðshæft form. Jafnframt mun viðkomandi aðili aðstoða við uppsetningu gæðahandbóka og veita nauðsynlega ráðgjöf er varðar kröfur hins opinbera varðandi matvælaframleiðslu. Matarsmiðjan mun hafa öll tilskilin leyfi til matvælaframleiðslu og skapar því möguleika fyrir frumkvöðla í matvælavinnslu til þess að taka fyrstu skref framleiðslu og þróunar á vörum sínum án þess að leggja út í miklar fjárfestingar. Ætti slík aðstaða meðal annars að geta nýst bændum sem vildu selja afurðir sínar beint frá býli. Verkefnið er tilkomið vegna starfa landshlutanefndar fyrir Norðurland vestra sem hafði m.a. það markmið að efla byggðaþróun og fjölga atvinnutækifærum á svæðinu. Gert er ráð fyrir að Matarsmiðjan verði tilbúin til notkunar seint á þessu ári eða í janúar 2017 og eru bundnar vonir við að fólk af svæðinu muni sjá sér hag í að nýta aðstöðuna.      

Mynd vikunnar

Húni Hu 1. Húni Hu 1 leggur af stað til síldveiða úr Skagastrandarhöfn með nótabát í eftirdragi. Ekki er vitað hvenær myndin var tekin.