Multi Musica í Kántríbæ föstudagskvöldið

MULTI MUSICA hópurinn frumflutti tónleikadagskrá sína í Miðgarði þann fyrsta vetrardag við frábærar undirtektir áheyrenda.  
 Nú verða tónleikarnir endurteknir í Kántríbæ þann föstudaginn 27.nóvember næstkomandi kl. 21.00.
Farið er með áhorfendur í einskonar heimsreisu en flutt verða 14 lög frá 12 löndum.
Löndin sem um ræðir eru Spánn, Ísrael, Rúmenía, Kúba, Mexíkó, Chile, Argentína, Brasilía, Indland,Grikkland, Suður-Afríka og Kenía.  Um afar fjölbreytta tónlist er að ræða, þjóðlög, tangó og salsa svo eitthvað sé nefnt og fá áheyrendur að upplifa hlýlega og seiðandi tónlist í byrjun vetrar í alþjóðlegri stemningu. Multi Musica eru: 
Ásdís Guðmundsdóttir, söngur og ásláttur
Sorin Lazar, gítar 
Jóhann Friðriksson, trommur
Rögnvaldur Valbergsson, hljómborð,gítar og harmonikka
Sigurður Björnsson, bassi
Sveinn Sigurbjörnsson, bongó og trompet
Íris Baldvinsdóttir, bakraddir og ásláttur
Jóhanna Marín Óskarsdóttir, bakraddir, strengir og ásláttur
Ólöf Ólafsdóttir, bakraddir og ásláttur
Þórunn Rögnvaldsdóttir, bakraddir og ásláttur Kynnir á tónleikunum verður Íris Baldvinsdóttir.  Tónleikarnir hefjast kl. 21.00 og er aðgangseyrir kr.1.500.  Ekki missa af þessum frábæru tónleikum! Tónleikarnir eru styrktir af minningarsjóðnum um hjónin frá Garði og Vindhæli.

Opið hús hjá Nes listamiðstöð

Listamenn hjá Nes listamiðstöð opna vinnustofur sínar í lok hvers mánaðar þar sem þeir sýna þau verk sem þeir hafa verið að vinna að frá komu sinni. Í kvöld þriðjudaginn 24. nóvember viljum við bjóða öllum sem áhuga hafa að koma í heimsókn, skoða listaverk í vinnslu og spjalla við listamennina um verkin og dvölina á Skagatrönd.  Þessa stundina dvelja sjö listamenn frá þremur heimsálfum í Listamiðstöðinni á Skagaströnd.

Biskup með fyrirlestur á Löngumýri

Hr. Jón A. Baldvinsson, biskup á Hólum verður með fyrirlestur á Löngumýri í Skagafirði miðvikudagskvöldið 25. nóvember kl. 20. Nefnist hann „Hlutverk biskupsembættisins á Hólum fyrr og nú fyrir kirkju og kristni“. Þetta er fyrsta kvöldið í fyrirlestrarröð Löngumýrar um kirkjuna og stöðu hennar í margvíslegum skilningi. Fjallað verður um sögur af biskupum og hlutverki þeirra fyrr og nú, sögu biskupsstólsins á Hólum, stöðuna í dag og framtíðarsýn og spurt um tengsl safnaðanna við biskupsembættið. Löngumýrarnefnd býður alla velkomna.

Húnabjörgin dregur bát til hafnar

Um klukkustund eftir að björgunarskipið Húnabjörg á Skagaströnd var kallað út kom það til hafnar með snurvoðarbátinn Stefán Rögnvaldsson EA845.  Báturinn var á veiðum rétt um tvær sjómílur fyrir vestan Skagastrandarhöfn. útkallið kom um klukkan 10:45 og viðbrögð björgunarsveitarmanna voru sem fyrr eldsnögg. Aðeins ellefu mínútum síðar var lagt af stað frá bryggju. Eins og sjá má á meðfylgjandi myndum var blankalogn á Húnaflóa, eins og svo oft áður á undanförnum vikum. Stefán Rögnvaldsson hafði fengið snurvoðina í skrúfuna. Þriggja manna áhöfnin beið sallaróleg eftir aðstoð enda engin hætta á ferðum.

Endurvinnslutunnum dreift í hús

Tímamót eru nú á Skagaströnd. Verið er að dreifa í hús nýjum ruslatunnum og verða framvegis tvær tunnur á íbúð, önnur er fyrir óflokkaðan úrgang og hin fyrir það sem á að fara til endurvinnslu.  Sú breyting verður á sorphirðun að tunnan með græna lokinu verður losuð mánaðarlega en hin, sú með svarta lokinu, verður losuð á tveggja vikna fresti. Mikilvægt er að setja allan pappír og pappa  beint í endurvinnslutunnuna. Málmar fernur og plast skal þó setja í glæra poka svo auðveldara verði að flokka þessa hluti. Gömlu tunnurnar eru eign húseigenda. Að öðru leyti er vísað í bækling um endurvinnslu sem dreift var í öll hús á Skagaströnd um síðustu mánaðarmót.  Á myndinni eru Hörður Aðils Vilhelmsson og Guðni Már Lýðsson með fangið fullt af tunnum.      

Hugrún og Jonni sigruðu í Drekktu betur

Hugrún Hallgrímsdóttir og Jón Ólafur Sigurjónsson sigruðu í spurningakeppninni Drekktu betur sem haldin var síðasta föstudagskvöld í Kántrýbæ. Spyrill, dómari, alvaldur og höfundur spurninga var Jóhann Sigurjónsson. Spurningarnar voru mjög góðar, tóku á ýmsum þáttum mannlegrar tilveru. Hins vegar voru sigurvegararnir aðeins með 15 rétt svör. Oftast eru þeir sem sigra með 20 til 23 spurningar réttar. Bendir þetta eindregið til þess að spurningarnar hafi verið þungar. Þó kvartaði enginn. Skýringin er án efa sú að Jóhann var afar mildur og góður stjórnandi. Hann fór oftar en ekki að kröfum salarins sem vildi fá að velja úr þremur eða fjórum svarmöguleikum. Og að sjómannasið leyfði Jóhann engum að komast upp með neinn derring og voru þátttakendur því bljúgir og blíðir sem fermingarbörn í kirkju. Engu að síður var spurningakeppnin mjög skemmtileg. Talnaglöggir menn náðu í sameiningu að telja rétt tæplega 58 gesti. Ekki verður upplýst hver þessi tæpilegi var. Á eftir spurningakeppninni tróð upp glæsilegur ástralskur listamaður sem dvelur hjá Nes listamiðstöð. Hún Di söng lög frá heimalandi sínu og víðar við geysilega góðar undirtektir áheyrenda. Hér eru svo spurningar Jóhanns Sigurjónssonar í spurningakeppninni Drekktu betur föstudaginn 13. nóvember 2009. Hvaða hús var flutt frá kálfshamarsvík til skagastrandar 1938? Svar: Iðavellir. Hver er mest selda plata Michaels Jackson? Svar: Thriller Frá hvaða landi kemur Lapin Kulta bjórinn? Svar: Finnlandi Hvað af eftirtöldu lýsir ekki fyrirbæri á golfvelli? a) Flöt b) Glenna c) Glompa d) Kargi. Svar: b) Glenna Hvaða fiskur hefur verið kallaður Vestfirðingur? Svar: Steinbítur Hvað merkir orðtakið “að höggva máfinn”? a) Að drepa máf b) Að syngja falskt c) að kinka kolli d) að strokka skrykkjótt  Svar: c) að kinka kolli Hvað gerir Windows-tölva ef þú gefur henni skipunina CTRL+N? Svar: a)eyðir síðasta orði b)opnar nýtt skjal c)hættir við síðustu aðgerð d) velur allan textann  Svar: b) Opnar nýtt skjal Frægur lagatexti byrjar svona: „Stolt siglir fleyið mitt stórsjónum á ...“     svo komið þið með seinna erindið ...  og eftir hvern er textinn? Svar: „Sterklegur skrokkurinn vaggar til og frá.“ Gylfi Ægisson Hvað er unnið úr báxíti? Svar:  Ál Til hvers eru holur á golfkúlu? Svar: Þær auka flughraðann Í hvaða hljómsveit var Björk áður en hún byrjaði í Sykurmolunum? Svar: Kukl Hvaða hljómsveit heiðraði minningu ljóðskáldsins Jónasar Árnasonar með vel seldri plötu og hvað heitir platan? Svar: Papar/Riggarobb Hvernig sjávardýr er Skollakoppur?  Svar: Ígulker Hvaða ár var myndin Börn náttúrunnar tilnefnd til óskarsverðlauna? Og hver var leikstjórinn?   Svar: 1991/ Friðrik Þór Friðriksson Hvaða dag og ár kom Arnar HU 1 nýsmíðaður frá Norgi í fyrsta skipti til Skagastrandar?  Svar: 22.des 1992 Hvenær var útgerðafélag Höfðakaupstaðar stofnað og hverjir stofnuðu það?   Svar: 1947 Höfðahreppur, Kaupfélagið og nokkrir einstaklingar í bænum (50). Hvað heitir fyrsta lagið sem Íslendingar sendu í söngvakeppni evrópskra sjónvarpstöðva og eftir hvern er það? Svar: Gleðibankinn, Magnús Eiríksson Hver er myndin, hún var frumsýnd 6.ágúst 2003.  Hún er með hinum vinsæla Johnny Depp og var mjög vinsæl hér á landi sem erlendis. Hver er myndin?  a) Charlie and the Chokolate factory  b) Neverland  c) Pirates of the Caribbean  d) Secret Window    Svar: c)Pirates Úr hverju er íslenska myntin þá er ég að spyrja um 1, 5 og 10 krónu peningana?   Svar:( 75%) Kopar og (25%) Nikkel Eru dúfur, hænur og rjúpur af sömu ætt? Svar: Nei Hvað var Austurlandahraðlestin?  Svar: Austurlandahraðlestin          (e. Orient Express) var lest sem gekk á milli Parísar og Istanbúl á árunum 1883-1977. Nefnið að minnsta kosti þrjú önnur íslensk nöfn yfir botnfiskinn Skrápflúru?  Svar: Skrápkoli, brosma, Flúra, gedda, gelgja, skrápkola, stórkjafta, þjalakoli. Hvað eru mörg björgunarskip umhverfis landið eins og Húnabjörgin? Svar: 14 talsins Hversu margir litir eru í regnboga?   Svar: 7 Hver þessara borga liggur vestast? A) Osló b)Berlín  c)Prag d)Róm      Svar: a) Osló Hvað eiga leikararnir Charlie Sheen og Emilio Estevez sameiginlegt?     Svar: Föður Nefnið eitt annað Íslenskt nafn yfir veiðarfærinu snurvoð og hvað er enska heitið á því? Svar: Dragnót, seine net. Hvert er hæsta fjall norðurlands?  Svar: Kerling 1536 m. Hvaða ár varð Tsjernobyl kjarnorkuslysið? Svar: 1986 Hver var valin fremsta skíðakona landsins árið 2008? Svar: Dagný Linda Kristjánsdóttir. 

Flottir tónleikar framundan í Kántrýbæ

Gunnar Þórðarson verður með tónleika í Kántrýbæ fimmtudaginn 10. desember og mun hann flytja mörg af sínum þekktu lögum. Föstudagskvöldið 27. nóvember kl. 20:30 verður tónlistarhópurinn Multi Musica með tónleika í Kántrybæ. Hann mun flytja létta fjölþjóðlega tónlist sem hann flutti í síðasta mánuði í Miðgarði í Skagafirði. Tíu manns eru í hópnum og er tónlistin lög flutt og samnin af konum frá þrettán þjóðlöndum. Báðir tónleikarnir verða nánar auglýstir síðar.           

Jóhann í Drekktu betur og áströlsk söngkona

Jóhann Sigurjónsson, skipstjóri og gleðigjafi verður spyrill í skemmtilegu spurningakeppninni. Þetta er í tuttugasta skiptið sem spurningakeppnin er haldin og sem fyrr er hún á föstudagskvöldið 13. nóvember kl. 21:30 Ekki er að efa að Jóhann mun spyrja ágengra og áhugaverðra spurning, jafnvel um útgerð og sjómennsku en áreiðanlega líka um tónlist.   Á eftir syngur hin stórfræga ástralska country/western stjarna Fleur Ball lagið sitt eina og kannski fleiri. Listamaðurinn dvelur hjá Nes listamiðstöð.   Á ensku er kynningin hennar þessi: Nes artist residency presents Fleur Ball - the Country and Western superstar from Australia. Fleur will expertly sing her one hit song and attempt a few others from her. It’s easy to play country and western songbook. Kantry Bær, Skagastrond, Island, Friday 13th November,11.00pm (or when the pub quiz finishes).

Létt dagskrá í tali og tónum í Hólaneskirkju

Þriðjudagskvöldið 17. nóvember kl. 20:30 verður létt dagskrá í tali og tónum í Hólaneskirkju. Kirkjukór Glaumbæjarprestakalls í Skagafirði syngur undir stjórn Stefáns R Gíslasonar. Einsöngvari er Ásdís Guðmundsdóttir. Undirleikarar með kórnum Stefán Gíslason, Margeir Friðriksson og Víglundur Rúnar Pétursson. Kynnir er sr. Gísli Gunnarsson. Allir velkomnir, aðgangur  ókeypis. Dagskráin er styrkt af minningarsjóðnum um hjónin frá Garði og Vindhæli.

Fundur um atvinnutækifæri í ferðaþjónustu skilaði miklu

Gott fyrirtæki var sannarlega eitt sinn aðeins hugmynd. Þetta var meginmál ræðumanna á fundi um atvinnutækifæri í ferðaþjónustu sem haldinn var á Skagaströnd í síðustu viku. Fundurinn var ætlaður sem hvatningafundur fyrir þá sem áhuga hafa á að hasla sér völl í ferðaþjónustu en vantaði upplýsingar. Nokkrir reynsluboltar voru ræðumenn og miðluðu fundargestum af þekkingu sinni. Fundarboðendur voru Sveitarfélagið Skagaströnd, Samtök sveitarfélaga á Norðurlandi vestra, Markaðsstofa ferðamála á Norðurlandi og Ferðamálasamtök Norðurlands vestra Fundinn setti Adolf Berndsen oddviti sveitafélagsins Skagstrandar. Hann ræddi um hvernig ferðaþjónustan hefði fengið byr undir báða vængi og eftir hrunið hefði orðið ákveðin hugarfarsbreyting. Á Skagaströnd hefði bæjafélagið eflst með því að  opinberum störfum hefur fjölgað en sterk innviði og öflugt samfélag er forsenda blómlegrar ferðaþjónustu. Hann nefndi uppbyggingu sem þegar hefði átt sér stað. Kántrýbæ skiptir miklu máli og Nes listamiðstöðin hefur bæst við. Listamenn sem þangað koma hafa fullyrt að hún hún standist þeirra væntingar og þá um leið að Skagaströnd hefur allt að bjóða sem gestir þurfa. Skipulag ferðaþjónustu í Þingeyjarsýslum EdwardH. Huijbens forstöðumaður rannsóknarseturs ferðamála við Háskólann á Akureyri sagði frá skipulagi ferðaþjónustunnar í Þingeyjarsýslum. Að verkefninu stóðu Ferðamálasetur Íslands og Rannsóknarstofnun ferðamála á Nýja Sjálandi fyrir Atvinnuþróunarfélag Þingeyinga. Vinnan byggði á reynslu og vinnu sérfræðinga frá Kanada og Nýja Sjálandi. Markmið stefnumótunarinnar var að greina möguleika til uppbyggingar á ferðaþjónustu til framtíðar út frá úttekt á því sem svæðið hefur upp á að bjóða.  Úttektin var unnin í samvinnu við hagsmunaaðila og þarfir ferðaþjónustunnar til framtíðar greindar mjög ítarlega. Úttektin var unnin af íslenskum sérfræðingum en greining og kortavinna var í höndum erlendra sérfræðinga og byggði á reynslu þeirra frá ýmsum svæðum hvaðanæva úr heiminum. Í sameiningu unnu rannsakendur og hagsmunaaðilar stefnumótun til fimm ára, en áætlað er að vinnan verði endurtekinn að þeim tíma liðnum. Landfræðilegum upplýsingakerfum (GIS) var beitt við úttekt og greiningu á ferðaþjónustu í Þingeyjarsýslum. Taldi Edward það afar mikilvægan þátt í verkefninu.  Gögnum um einstaka staði, til dæmis fossa, byggðaminjar, sundlaugar, veitingastaði og vegaslóða var safnað í aðgreindar þekjur sem nýttust til að átta sig á þyrpingum ólíkra möguleika til uppbyggingar í framtíðinni.  Þannig var þáttað saman nálgunum fræðimanna og hagsmunum atvinnugreinarinnar á máta sem er auðframsetjanlegur í kortum og myndum en jafnframt nýtist til frekari greininga.  Landfræðilegi upplýsingagrunnurinn sem byggður var upp í Þingeyjarsýslum mun nýtast sem fyrirmynd í sambærilega gagnaöflunar og stefnumótunarvinnu á öðrum landssvæðum og getur að lokum orðið undirstaða landnýtingaráætlunar fyrir íslenska ferðaþjónustu.  Edward fullyrti að mjög auðvelt væri að nota þessa skipulagsvinnu á Norðurlandi vestra og jafnvel á smærri svæðum eins og annarri hvorri Húnavatnssýslunni eða báðum. Þannig væri hægt að segja til um framtíðarhagsmuni á þessum slóðum og leggja til ítarlega uppbyggingu á ferðaþjónustunni. Afþreying Sigurður Sigurðarson markaðsráðgjafi Sveitarfélagsins Skagastrandar ræddi um afþreyingu og mikilvægi hennar í ferðaþjónustu.  Hann lagði áherslu á að vilja núorðið frekar vera þátttakendur og gerendur en hlutlausir þiggjendur. Afþreying eykur líkurnar á því að ferðafólk dvelji lengir á hverjum stað, forsenda þess að þau kaupi ýmiskonar þjónustu sem er í boði.  Sigurður nefndi að sumir teldu að á Norðurlandi vestra væri mikill skortur á „stórkostlegum náttúruminjum“. Það er einfaldlega rangt enda misjafnt hvað menn teldu vera stórkostlegt. Mikill munur er til dæmis á viðhorfi innlendra og erlendra ferðamanna í því efni. Hægt sé að byggja upp afþreyingu sem nýti náttúrufar hvers svæðis, nefna mætti menningartengdra ferðaþjónus.  Hvalaskoðun Ásbjörn Björgvinsson framkvæmdastjóri Markaðsstofu Norðurlands ræddi um hvalaskoðun og upphaf hennar á Húsavík. Fyrir hafði ekkert umtalsvert væri en hún hefði breytt bænum og byggt upp ýmis konar aðra ferðaþjónustu. Hann ræddi um ströndina og sjóinn með áherslu á söguna, fugla og sjávarspendýr.  Uppbygging ferðaþjónustufyrirtækja þarf að minnsta kosti þriggja ára reynslutíma og tryggt þjónustuframboð á meðan. Hann lagði áherslu á að búa þyrfti til vörumerki fyrir Norðuralnd vestra þar sem saman kæmi sýn, tilgangur og hvað er áhugavert.  Spurningin er ekki endilega um fjölda heldur hvað þeir geri sem hingað koma og hve lengi þeir dvelja og ekki má gleyma mikilvægi heimamarkaðar en máli sýnu til stuðnings vísaði Ásbjörn í nýútkomna (október 2008) hliðarreikninga Hagstofunnar fyrir ferðaþjónustu.  Sjóstangveiði Haraldur Ingi ræddi um sjóstangveiði með eikarbátnum Niels sem lengi hefur gerður út frá Hauganesi á Árskógsströnd. Veiðin er yfirleitt góð, þorskur, ýsa, ufsi og steinbítur eru algengur afli. Veiðimönnum gefst líka kostur á viðkomu í Hrísey. Sjóstangaveiðin tekur um það bil þrjár klukkustundir og farið er daglega á tímabilinu maí til september, jafnvel í október.  Haraldur fjallaði einnig um þau tækifæri sem felast í ferðaþjónustu tengdri sjónum og hvað læra mætti af reynslu þeirra.  Mikil ástæða væri á að bjóða upp á heildsteypta ferðavöru sem byggð væri úr ólíkum þjónustuþáttum. Einnig má draga úr árstíðarvanda greinarinnar með fjölbreyttari notum, t.d. að báturinn sem gerður er út í ferðaþjónsutu nýtist einnig í hefðbundna útgerð eða jafnvel vöruflutninga.  Mikilvægt er því að vera sveigjanlegur og geta lagað sig að því sem í boði er. Nauðsynlegt er að þekkja í þaula þá atvinnugrein sem ætlunin er að hasla sér völl í. Starfsmenn fyrirtækisins þekkja sjávarbotninn og mið um allan Eyjafjörð og með því geta þeir tryggt ánægju gesta.  Gisting Stefán Haraldsson atvinnuráðgjafi SSNV og stjórnarformaður Farfugla ræddi um skilgreiningar á gististöðum skv. reglugerðum og lýsti svo þjónustuframboði á farfuglaheimilum og helstu tölum.  Stefán nefndi að mikill uppgangur væri í sölu gistirýma hjá Farfuglum og æ fleiri gistiheimili bættust í hópinn með hverju ári. Salan á þessu ári og síðasta ári hefur aldrei verið meiri. Hins vegar eru útlendingar um 85% af viðskiptavinunum. Margir hafa ágætist afkomu af gistiþjónustu Farfugla og eru herbergin yfirleitt frá 16. Hann nefndi í því sambandi gistiheimili sem væri að stækka við sig upp í rúm fyrir 60 manns og er það staðsett langt frá alfaraleið og líkur benda til þess að aðsóknin verði framvegis ekki síðri en þegar það var með 20 rúm. Mestu skipti að gestgjafinn fylgist vel með og taki persónulega á móti gestum sínum og hugsi vel um velferð þeirra. Aðeins tvö farfuglaheimili eru á Norðurlandi vestra. Gönguferðir Kristján Eldjárn úr Svarfaðardal talaði um uppbygginu ferðaþjónustu á Húsabakka. Hann hefur nýtt umhverfi Svarfaðardals til gönguferða í samvinnu við Ferðafélag Íslands og fleirri aðila auk þess að bjóða heimamönnum upp á gönguferðir. Hann hefur lagt áherslu á að gera gönguferðir áhugaverðar með sögum sem nóg er af á þessum slóðum.  Kristján segist hafa í upphafi haft litla þekkingu á gönguferðum en þekkingin hafi smám saman aukist. Hann leggur áherslu á að fara ekki með of stóra hópa svo leiðsögn hans nýtist en bætir við leiðsögumanni ef hópurinn er stór. Menningatengd ferðaþjónusta Örlygur Kristfinnsson framkvæmdastjóri Síldarminjasafnisins á Siglufirði lýsti uppbyggingu þess. Hann lagði áherslu á að í menningartengdri ferðaþjónustu væru áformin skýr og hugmyndir vel ígrundaðar svo auðveldara sé að afla fjár til verkefnisins.  Örlygur nefndi að Síldarminjasafninu hafi verið mikilvægt þegar efnt er til viðburða í kringum uppbyggingu húsa. Það hafi hjálpað mikið til að vakið athygli á framkvæmdunum.  Drifkraftur framkvæmda í hans tilfelli var ást á staðnum, þekking reynsla og áhugi á sögu bæjarins. Í máli Örlygs koma skýrt fram að uppbygging Sildarminjasafnis hafi verið öðrum óskyldum ailum hvatning til að leggja stunda á ferðaþjónustu. Smám saman hafi henni aukist kraftur á Siglufirði og fjöldi fyrirtækja, lítilla og smárra risið upp. Fundinum um atvinnutækifæri í ferðaþjónstu lauk með fyrirspurnum úr sal og kom í ljós mikill áhugi gesta á að fá meiri upplýsingar.  Fundarstjóri var Jón Óskar Pétursson, framkvæmdastjóri SSNV. Í máli hans kom fram að samtökin ætla sér að halda áfram með hvatningarfundi í ferðaþjónustu. Innan þeirra eru starfandi nokkrir atvinnuráðgjafar sem getað starfað með þeim sem áhuga hafa á stofnun ferðaþjónustufyrirtækja á Norðurlandi vestra og er vinna þeirra öllum að kostnaðarlausu. Samantekt þessa unnu Edward H. Huijbens og Sigurður Sigurðarson.