Þorrablót 2009

Þorrablót Kvenfélagsins Einingar  verður í Félagsheimilinu á Skagaströnd laugardaginn 7. febrúar 2009.   Húsið opnað kl. 20:00. Borðhald hefst stundvíslega kl. 20:30. Veislustjóri er Lárus Ægir Guðmundsson. Skemmtiatriði að hætti heimamanna Kántrýbær sér um matinn Hljómsveitin Vítamín sér um að halda uppi fjörinu til klukkan 03:00 Miðaverð kr. 5.000. Miðasala verður í félagsheimilinu sunnudaginn 1. febrúar á milli kl. 11:00 og 12:00   Eldri borgarar ásamt unglingum fæddum árið 1993 greiða kr. 4.000.   Kvenfélagið Eining

Samtals 33,7 milljón kr. fjárlögum til Skagastrandar

Samkvæmt fjárlögunum ársins 2009 munu styrktir og framlög til Húnavatnssýslna nema rúmlega 70,0 milljónum á næsta ári. Hæst ber þar styrkur til Sjávarlíftækniseturs á Skagaströnd en því er úthlutað 22,7 milljónum og framlag til tveggja sérfræðinga í Húnavatnssýslu sem er úthlutað 17,0 milljónum. Af öðrum verkefnum þá má nefna eftirfarandi: Grettistak ses, 1,5 milljón, Selasetur 5,0 milljónir, Hálendismiðstöð á Hveravöllum 4,0 milljónir, Grettisverkefni í Húnaþingi vestra 4,0 milljónir, Nes, listamiðstöð Skagaströnd 1,0 milljón, Spákonuhof á Skagaströnd 4,0 milljónir, Á slóðum Vatnsdælusögu 2,0 milljónir, Biopol á Skagaströnd 6,0 milljónir og Hveravallafélagið, mannahald á Hveravöllum á veturna 1,5 milljón. Einnig mun verða veitt fjármagn í sjóvarnir á Norðurlandi upp á 19,4 milljónir. Af ofangreindu má ráða að veittir eru styrkir og framlög til Skagastrandar að fjárhæð kr. 33,7 milljónir króna.

Lárus Ægir maður ársins á Húnahorninu

Lesendur Húnahornsins hafa valið Lárus Ægi Guðmundsson á Skagaströnd mann ársins 2008 í Húnaþingi. Lárus Ægir fékk yfirburða kosningu í valinu eða rúmlega 80% atkvæða. Lárus Ægir stofnaði á síðasta ári styrktarsjóð til eflingar menningar- og listalífi á Skagaströnd og Skagabyggð. Sjóðnum er einnig ætlað að greiða styrki til þeirra sem verða fyrir slysum eða alvarlegum veikindum og þarfnast aðstoðar. Stofnfé sjóðsins eru 50 milljónir króna og áætlað að styrkir úr honum geti numið allt að 5 milljónum á ári. Lárus Ægir er borinn og barnfæddur á Skagaströnd og liggja rætur hans þar sem hefur hann starfað mestan hluta ævi sinnar. Af þeim verkefnum sem hann hefur unnið að má nefna þessi: · Sveitarstjóri á Skagaströnd frá árinu 1972 til 1984. · Framkvæmdastjóri frystihússins Hólanes frá 1984 til 1994. · Stofnandi, eigandi fiskmarkaðarins Örva á Skagaströnd, framkvæmdastjóri hans frá 1994 til 2007. Lárus Ægir hefur sinnt fjölmörgum málum sem til framfara hafa horft á Skagaströnd. Hann keypti meðal annars í félagi við aðra gamla kaupfélagshúsið og gerði það upp. Húsið hefur að hluta til þegar verið tekið í notkun og í því eru skrifstofur Menningarráðs Norðurlands vestra og BioPol ehf. Hann átti líka þátt í að kaupa húsið sem áður var frystihúsið Hólanes en til stendur að breyta því og finna hentuga starfsemi fyrir það.

Næsti fundur sveitarstjórnar

FUNDARBOÐ Fundur verður haldinn í sveitarstjórn Skagastrandar þriðjudaginn 27. janúar 2009 á skrifstofu sveitarfélagsins kl 800. Dagskrá: 1. Fjárhagsáætlun 2009 (önnur umræða) 2. Bréf: a) Farskólans, dags. 22. janúar 2009. b) Sturlu Böðvarssonar, dags. 1. desember 2009. c) Heilbrigðisráðuneytisins, dags. 7. janúar 2009. d) Framkvæmdastjóra SSNV, dags. 5. janúar 2009. e) Landsskrifstofu Std 21, dags. 20. janúar 2009. 3. Fundargerðir: a) Fræðslunefndar, 21. janúar 2009. b) Stjórnar SSNV, 14. janúar 2009. 4. Önnur mál Sveitarstjóri

Með bros á vör og ljós í glugga

Gleðibankinn hvetur þjóðina til að taka ótæpilega út innistæður sínar í bankanum. Þá biður bankinn íbúa þessa lands að sýna friðarhug sinn í verki og setja næstu kvöld áberandi ljós út í þann glugga sem snýr að götu eða friðarkerti við útidyr ef veður leyfir. Megi þeir sem nærast á ofbeldi og eignaspjöllum sjá að landsmenn eru slíku andsnúnir. Á síðustu vikum hefur nokkur halli verið á viðskiptum Gleðibankans með Bros, Spaug og Hlátra. BSH vísitalan er víst fremur neikvæð þessa dagana. Það skal undirstrikað að ekki eru bein tengsl milli Gleðibankans og stöðu efnahagsmála. Hins vegar er það Gleðibankanum áhyggjuefni að landsmenn skuli kjósa að leggja inn BSH (bros, spaug og hlátur) en brúka þess í stað YB (ygglibrún) sem er óæskilegur gjaldmiðill í samskiptum fólks. Um leið og Gleðibankinn óskar eftir því að landsmenn brúki innistæður sínar sem mest og leggi YB af vill hann taka eftirfarandi fram: Innistæður eru nægar, lánalínur tryggar, krosseignatengsl örugg og viðskiptavild ótæmandi. Í ljósi þessara aðstæðna biður Gleðibankinn mótmælendur efnahagskreppunnar að ganga hratt inn um gleðinnar dyr og stuðla að varanlegum friði milli ólíkra aðila í þjóðfélaginu. Það er rétt sem forðum var mælt að friður er grundvöllur allra góðra þjóðfélagsaðgerða. Fréttatilkynning frá Gleðibankanum Aðalútbúið á Skagaströnd Fyrir hönd Gleðibankans bankastjórar

Óli Benna stjórnar Gettu betur í kvöld

Stjórnandi, spyrill, dómari og alvaldur í Gettu betur í kvöld verður Ólafur Bernódusson, kennari og þúsundþjalasmiður á Skagaströnd. Hann spyr af myndugleik kennarans, glettni húmoristans, visku hins fjölfróða og kæruleysi grallarans Flestir þekkja Óla. Hann hefur verið afar getspakur í spurningakeppninni og vann til dæmis þá síðustu ásamt konu sinni. Sumir halda því fram að það hafi nú eiginlega verið hún Guðrún sem eigi allan heiðurinn af sigrinum. Hvað um það, Óli er líka með afbrigðum fjölfróður og ekki að efa að keppnin verður ákaflega skemmtileg með mann á borð við Óla við stýrið. Reglur keppninnar eru óteljandi og afar flóknar. Hér er stuttur úrdráttur: 30 spurningar, skrifleg svör - Einn spyrill, sem er dómari og alvaldur - Bjórkassi í verðlaun fyrir þá sem hafa flest svör rétt - „Bjórspurningin“; verðlaun fyrir rétt svar er bjórglas á barnum

Badmintonspilari verður skyndilega fimmtugur

Þróttmikill badmintonklúbburinn á Skagaströnd gaf einum félaga sinna skemmtilega fimmtugsafmælisgjöf síðasta mánudag. Klúbburinn hefur lengi verið mjög virkur, hittast félagar tvisvar í viku í íþróttahúsinu og reyna með sér.   Síðasta mánudag varð einn badmintonfélaginn skyndilega fimmtugur. Var það Adolf Berndsen, margir þekkja, en drengurinn hefur lengi verið búsettur hér í bæ - sumir segja frá fæðingu, aðrir lengur. Adolf þessi hefur alla tíð verið efnilegur í badminton. Hann tekur hvern leik mjög alvarlega, spilar ávallt til sigurs, sættir sig aldrei við jafntefli ... Hann leikur jafnan fullklæddur, brúkar síðbuxur, ermalanga skyrtu og elstu menn muna ekki eftir öðru en þessum sama svarta samkvæmisklæðnaði.   Leikur Adolfs byggist á stanslausri sókn. Gefur hann mótherjum sínum aldrei nokkurn grið og svo ákaft er leikið að hann bannar jafnan samherja sínum að eiga orðastað við andstæðingana - segir það trufla einbeitingu þeirra sem búa ekki yfir andlegri staðfestu og einbeitni.   Badmintonspilurum á Skagaströnd þykir ákaflega vænt um Adolf. Í tilefni afmælisins létu þeir hinn kunna teiknara Guðráð draga upp mynd. Hún hefur víðtæka skírskotun í fjölmörg og ólík hlutverk Adolfs í lífinu. Á henni má sjá golfkerru, fótbolta, sveitarfélagslurkinn, ránfugl íhaldsins, badmintonspaða, nokkur fyrirtækislógó og ekki síst hið undurfagra Spákonufell sem er í bakgrunn. Formóðir Adolfs er Þórdís spákona sem fjallið er kennt við. Hún nam land á Skagaströnd klukkan 14:39 þann 30. júní 975.   Meðfylgjandi er mynd af teikningunni. Einnig er mynd af þeim badmintonspilurum sem treystu sér til að taka þátt í mánudagsæfingunni. Adolf þekkist á því að hann er í svörtum samkvæmisfötum, stendur fyrir miðju og er með teikninguna góðu í höndunum. Smella má á myndirnar til að stækka þær.

Næsti fundur sveitarstjórnar

FUNDARBOÐ Fundur verður haldinn í sveitarstjórn Skagastrandar þriðjudaginn 20. janúar 2009 á skrifstofu sveitarfélagsins kl 800. Dagskrá: 1. Fjárhagsáætlun 2009 2. Bréf: a) Nes listamiðstöðvar, 15. janúar 2009. b) Skipulagsstofnunar, 7. janúar 2009. 3. Fundargerðir: a) Hafnarnefndar, 29. desember 2008 b) Sjórnar Félags- og skólaþjónustu A-Hún 9.01.2009. c) Stjórnar byggðasamlags um Tónlistarskóla A-Hún. 22.12.2008. d) Stjórnar Sambands ísl. sveitarfélaga, 12.12.2008. 4. Önnur mál Sveitarstjóri

Afhjúpun í vændum á Skagaströnd

Ýmis mál verða afhjúpuð þann 7. febrúar næstkomandi. Þau munu án efa gjörbreyta hinu viðkvæma samfélagi okkar á Skagaströnd. Frelsunin er í nánd ...! Ekki er víst að allir verði jafn sáttir við það sem fram mun koma en nær öruggt að samfélagið þarf á þessum atburði að halda. Ný Skagaströnd í burðarliðnum?  Þorrablótið verður nánar auglýst þegar nær dregur.

68 Skagstrendingar á skíðum síðasta laugardag

Líf og fjör var í Tindastóli síðastliðinn laugardag. Fyrsta skíðaferð Umf. Fram í vetur hlaut frábæran hljómgrunn þátttakan var framar björtustu vonum. Skagstrendingar fylltu 50 manna langferðabíl og til viðbótar þurfti að fara á 4 einkabílum til þess að allir gætu komist í fjallið. Taldist okkur til að 68 Skagstrendingar hefðu mætt til leiks og besta var að allir skiluðu sér heilir og brosandi heim aftur. Að sjálfsögðu verður þessum ferðum haldið áfram á laugardögum nema annað verði auglýst. Stjórn Umf. Fram