NPA: Umsóknarfrestur til 30. nóvember 2015 Norðurslóðaáætlunin (NPA) styrkir samstarfsverkefni a.m.k. þriggja aðildarlanda, löndin innan NPA eru Ísland, Grænland, Færeyjar, Noregur Svíþjóð, Finnland, Írland, Norður-Írland og Skotland. NPA óskar núna aðeins eftir styrkumsóknum sem falla undir áherslur 3 og 4: 3. Verkefni sem hlúa að og efla orkuöryggi samfélaga á norðurslóðum, hvetja til orkusparnaðar eða notkun endurnýjanlegra orkugjafa. 4. Verkefni sem vernda, þróa og koma á framfæri menningarlegri og náttúrlegri arfleið. Nánari upplýsingar um áherslur á þriðja umsóknarfresti er að finna hér http://www.interreg-npa.eu/fileadmin/Calls/Third_Call/Third_Call_Announcement.pdf Hámarksstærð verkefna er 2 milljónir evra og er styrkur háður a.m.k. 40% mótframlagi umsóknaraðila en styrkur til fyrirtækis er háður a.m.k. 50% mótframlagi. Mikilvægt er að verkefnin skili af sér afurð, vöru og/eða þjónustu sem eflir atvinnulíf, búsetu og/eða eykur öryggi íbúa á norðurslóðum. Á heimasíðu NPA www.interreg-npa.eu er að finna umsóknargögn og leiðbeiningar undir valtakanum ,,For Applicants“ ,, Third Calls“ Senda á umsóknina rafrænt eigi síðar en á miðnætti 30. nóvember n.k. á Kaupmannahafnartíma. A How to Apply Seminar verður haldið í Kaupmannahöfn 20. október n.k. Nánari upplýsingar og ráðgjöf má fá hjá tengiliði NPA á Íslandi sem er Sigríður Elín Þórðardóttir, Byggðastofnun sími 455 5400 og netfang sigridur@byggdastofnun.is Sigríður Elín Þórðardóttir Icelandic Regional Development Institute Ártorg 1, 550 Sauðárkrókur. Tel +3544555400, Fax +3544555499 E-mail: sigridur@byggdastofnun.is www.byggdastofnun.is

Við Blöndu. Veiðimenn við Blöndu áður en hún var virkjuð. Algengt var að menn keyptu sér saman eina stöng því áin þótti erfið. Hún var alltaf kolmórauð eins og kakósúpa og mest var veitt á spún af stærstu gerð þannig að oftar en ekki var laxinn húkkaður tilviljanakennt. Menn skiptust því á um að veiða en settust bara og fylgdust með félaganum meðan þeir voru ekki sjálfir að kasta fyrir laxinn og voru tilbúnir að stökkva af stað til að aðstoða við löndunina. Þá var líka algengt að áhugasamir gestir kæmu í heimsókn til að fylgjast með hvernig veiðin gengi. Á þessari mynd frá 1982 eru frá vinstri: Jóhann Björn (Baddi) Þórarinsson, Bernódus Ólafsson (d. 18.9.1996), Jósef Stefánsson (d. 9.12.2001) allir frá Skagaströnd og Lárus Jónsson Blönduósi (frá Bakka í Vatnsdal).

Starfsmann vantar við ræstingar á Heilsugæslustöðinni á Skagaströnd. Starfshlutflall er 12,5%, vinnutími getur verið samkomulag. Nánari upplýsingar gefur Ásdís Arinbjarnardóttir yfirhjúkrunarfræðingur í síma 4554100.

Vefmyndavélar á höfn eru óvirkar um stund vegna endurnýjunnar.

Höfðaborg Hu 10. Í bókinni "Sjósókn frá Skagaströnd & Vélbátaskrá 1908 - 2010" eftir Lárus Ægi Guðmundsson segir eftirfarandi um þetta skip: "Höfðaborg Hu 10. Togarinn var smíðaður úr stáli í Selby á Englandi árið 1916 og keyptur til Íslands 1919. Hann var 337 brl. með 600 ha. 3ja þjöppu gufuvél og var fyrsti togarinn sem Skagstrendingar eignuðust. Skipið hét Belgaum RE 153 þegar það var keypt til Skagastrandar í nóvember 1951 og gert út til 1954 af Höfðaborg h/f. Eigendur þess voru Höfðahreppur og allmargir íbúar í kauptúninu. Þetta reyndust fremur slæm kaup því skipið var lélegt og t.d. urðu menn að strengja segldúksbleðla yfir efstu kojurnar til að beina dekklekanum fram á gólfið. Síðasta sumarið sem togarinn var gerður út fór hann á síldveiðar en árangur varð ekki mikill. Togarinn var seldur í niðurrif til útlanda og tekinn af skrá í maímánuði 1955. " Myndin er í eigu Muna- og Minjasafns Skagastrandar. Gefandi: Helga Berndsen Karlsskála á Skagaströnd í júlí 1996.

Við Höfðaskóla er laus staða skólaliða, 75% starf. Vinnutími er frá kl. 9 til 16 virka daga. Starfið felur í sér þrif og gæslu nemenda. Umsóknarfrestur er til 16. október 2015. Nánari upplýsingar veita húsvörður og skólastjóri í síma 4522800 Skólastjóri.

Hjónin í Árnesi. Fritz H. Berndsen, sem byggði Árnes 1899 og bjó þar, situr hér við stofuborðið í Árnesi ásamt seinni konu sinni Jónínu J. Berndsen. Fritz leggur kapal en Jónína er með eitthvað á prjónunum. Enn má fara í heimsókn í Árnes, sem er elsta húsið á Skagaströnd og er nú safn, og skoða m.a. ljósalampann sem sést á myndinni.

Fiskur um allt dekk ! . Myndin var tekin um borð í Arnari Hu 1 - síðutogaranum - hafísvorið 1969. Verið er að láta trollið fara aftur eftir 20 - 30 tonna hal. Már Hall Sveinsson (d. 1.3.2008) er á gilsinum lengst til vinstri og Indriði Hjaltason (d. 2.4.2006) er við spili, Guðjón Jónsson er á forhleranum en í aðgerð eru frá vinstri: Magnús B. Jónsson, Viggó Maríasson (d. 30.7.1973) og Óskar Kristinsson, sem snýr baki í myndavélina. Maðurinn milli Viggós og Óskars er óþekktur.

Laugardaginn 19. september kl. 13:30-16:30 verða haldnir fyrirlestrar í Rannsóknasetri Háskóla Íslands á Norðurlandi vestra í samvinnu við Rannsóknastofu í jafnréttisfræðum. Fyrirlestrarnir eru í Bókasafni Halldórs Bjarnasonar, Gamla kaupfélagshúsinu, Einbúastíg 2 Erindi halda: 13:30-14:00: Páll Sigurðsson, prófessor emeritus í lögum, flytur erindið Tveir norðlenskir lögskýrendur – Lögbókarskýringar Páls lögmanns Vídalíns og Björns Jónssonar, bónda og fræðimanns á Skarðsá 14:00-14:30: Nanna Þorbjörg Lárusdóttir sagnfræðingur talar um Góðtemplarastúkurnar og áhrif mótandi orðræðu Jólafundur í Daníelsher í Hafnarfirði um miðja 20. öld 14:30-15:00 Vilhelm Vilhelmsson sagnfræðingur heldur erindið Að halda friðinn.Um sáttanefndir í Húnavatnssýslu og störf þeirra á 19. öld. 15:00-15:30 Umræður og heitt á könnunni 15:30-16:10 Súsanna Margrét Gestsdóttir sagnfræðingur segir frá ömmu sinni í tilefni 100 ára afmælis kosningaréttar kvenna: Það var sól þann dag – um Súsönnu Margréti Gunnarsdóttur frá Norðurfirði á Ströndum (1926-2002). Súsanna Margrét með fjögur elstu börnin við heimili þeirra í Camp Knox-braggahverfinu 16:10 Umræður. Dagskrárlok eigi síðar en 16:30. Allir velkomnir

Nemendur í 7. bekk Höfðaskóla stefna á að fara í skólabúðirnar að Reykjum í Hrútafirði núna í haust. Sem hluti af fjáröflun í tengslum við þá ferð munu þau koma saman ásamt foreldrum sínum og baka kleinur til að selja. Baksturinn mun fara fram seinnipartinn á fimmtudag og munu krakkarnir ganga í hús meðan birgðir endast og bjóða 1 kg á 3.000kr eða 1/2kg á 1.500. Þeir sem vilja tryggja sér kleinur geta lagt inn pöntun hjá Vigdísi í síma 891-7869. 7. bekkur Höfðaskóla