Skagstrendingum og nærsveitamönnum boðið að skoða myndir af höfninni og sjálfum sér Í húsnæði Rannsóknaseturs HÍ í gamla kaupfélagshúsinu kl. 12-18 laugardaginn 13. og sunnudaginn 14. október 2012 Rannsóknasetur HÍ og sveitarfélagið Skagaströnd vinna nú saman að því að gera myndasafn sveitarfélagsins aðgengilegt almenningi á heimasíðu sveitarfélagsins. Ljósmyndasafnið telur nú um 13000 myndir sem allar tengjast Skagaströnd á einn eða annan hátt. Hver er á myndinni? – klukkan 12-18 Á laugardag og sunnudag liggur frammi hluti af ljósmyndasafni Sveitarfélagsins Skagaströnd og er fólk beðið um að hjálpa til við að þekkja fólk og staði á myndunum. Þetta er tilvalið tækifæri fyrir Skagstrendinga og nærsveitamenn til að rifja upp gamlar minningar og gera gagn á sama tíma. Óformleg dagskrá kl. 14. báða dagana Höfnin á Skagaströnd – myndir og spjall Klukkan tvö á laugardag og sunnudag sýnir Ólafur Bernódusson myndir úr fórum sveitarfélagsins af hafnarframkvæmdum og stiklar á stóru um sögu þeirra allt frá því fyrir aldamótin 1900 til dagsins í dag. Gestir eru beðnir um að taka þátt í frásögninni: leiðrétta, bæta við og segja frá því sem þeir vita. Öllum er boðið til leiks – sérstaklega þeir sem muna tímana tvenna. Í húsnæði Rannsóknarsetursins er Bókasafn Halldórs Bjarnasonar en það hefur að geyma mikinn fróðleik um sögu og ættfræði. Heitt verður á könnunni báða dagana og allir eru velkomnir. Ókeypis rútuferð frá Blönduósi á kl. 13 – brottför frá Kvennaskólanum. Rútan fer frá Skagaströnd kl. 15 Viðburðurinn er haldinn í samhengi við Sögulega safnahelgi á Norðurlandi vestra en þessa helgi taka nærri 30 söfn og setur á Norðurlandi vestra á móti gestum. Sjá nánar http://www.huggulegthaust.is/

Kjörskrá vegna þjóðaratkvæðagreiðslu þann 20. október 2012 liggur frami á skrifstofu Sveitarfélagsins Skagastrandar frá 10. október til kjördags. Kjörskrárstofninn miðast við þá sem áttu lögheimili í sveitarfélaginu samkvæmt íbúaskrá þjóðskrár 29. september 2012. Sveitarstjóri

Árleg inflúensubólusetning haustið 2012 Bólusett verður á Heilsugæslustöðinni á Blönduósi Föstudaginn 12/10 kl: 13:00-15:00 Mánudaginn 15/10 kl: 13:00-15:00 Fimmtudaginn 18/10 kl: 11:30-13:30 Bólusett verður á Heilsugæslustöðinni á Skagaströnd Fimmtudaginn 18/10 kl: 9:30-11:00 Föstudaginn 19/10 kl: 13:00-14:30 Sérstaklega er mælt með að einstaklingar 60 ára og eldri, einstaklingar með langvinna sjúkdóma, heilbrigðisstarfsfólk og þungaðar konur láti bólusetja sig. Þessir áhættuhópar fá bóluefnið frítt en þurfa að greiða komugjald. Einnig er mælt með því að sömu einstaklingar séu bólusettir á 10 ára fresti gegn lungnabólgu.

FUNDARBOÐ Fundur verður haldinn í sveitarstjórn Skagastrandar þriðjudaginn 9. október 2012 á skrifstofu sveitarfélagsins kl 800. Dagskrá: 1. Fjárhagsáætlun 2013 - forsendur 2. Ársfundur SSNV 3. Bjarmanes 4. Lokun urðunarstaðar 5. Fundur með þingmönnum Norðvesturkjördæmis 6. Kjörskrá vegna þjóðaratkvæðagreiðslu 7. Bréf: a. Stjórnar USAH, dags. 4. október 2012 b. Karlakórs Bólstaðahlíðarhrepps, dags. 2. október 2012 c. Innanríkisráðuneytisins, dags. 21. september 2012. d. Skipulagsstofnunar, dags. 24. september 2012. e. Umhverfis og auðlindaráðuneytisins, dags. 25. september 2012. f. EBÍ – Brunabót, dags. 13. september 2012 g. Atvinnu og nýsköpunarráðuneytisins, dags. 10. september 2012 8. Fundargerðir: a. Stjórnar Byggðasamlags um atvinnu og menningarmál, 3.10.2012 b. Stjórnar Byggðasamlags um Tónlistarskóla A-Hún, 24.09.2012 c. Heilbrigðisnefndar Norðurlands vestra, 5.09.2012 d. Stjórnar SSNV, 5.09.2012 e. Menningarráðs Nl. vestra, 5.09.2012 f. Hafnasambands Íslands, 19.09.2012 g. Stjórnar Sambands íslenskra sveitarfélaga, 7.09.2012 9. Önnur mál Sveitarstjóri

Þriggja kvölda spilavist hefst þann 1. okt. Síðan 8. okt. og 15. okt. og verður spilað í félagsheimilinu Fellsborg frá kl:20:00 stundvíslega. Verðlaun verða veitt fyrir hvert kvöld og síðan heildarverðlaun fyrir öll kvöldin. 800kr. fyrir hvert kvöld en ef borgað er fyrir öll kvöldin þá 2.000kr. kaffiveitingar innifaldar. Kvenfélagið Eining.

Laugardaginn 29. september klukkan 1600 - 18:00 verður boðið upp á námskeið og umræðufund um áhrif óhóflegrar tölvunotkunar unglinga með sérstaka áherslu á ofbeldisleiki. Námskeiðið fer fram í húsnæði Simey á Akureyri en verður sent gegnum fjarfundabúnað í námsstofuna á Skagaströnd, sem er á efstu hæðinni á gamla kaupfélaginu. Námskeiðið er ókeypis og allir eru velkomnir. Dagskrá: 1.Erindi frá Arnari Arngrímssyni og Guðjóni H. Haukssyni þar sem velt er fyrir sér spurningum sem varða tölvunotkun og áhrif á félagsfærni og þátttöku unglinga í samfélaginu. 2. Reynslusaga tölvufíkils 3. Þátttakendur fá tækifæri til að prófa ofbeldisfulla tölvuleiki og upplifa stemninguna fyrir framan skjáinn (EKKI Í BOÐI Á SKAGASTRÖND) 4. Pétur Maack, sálfræðingur fjallar um áhrif tölvuleikjanna og hvað er hægt að gera 5.Umræður Námsstofan

Vísindavaka er haldin árlega í Reykjavík í samvinnu margra skóla og aðila úr atvinnulífinu. Á vísindavöku er fjallað um allt milli himins og jarðar á skemmtilegan og skiljanlegan hátt. Með því að smella á hlekkinn hér fyrir neðan má sjá hvað er í boði á vökunni í ár. Kynntu þér málið og sjáðu hvort þú finnur ekki eitthvað sem þig langar að sjá og heyra. Fjölbreytt verkefni kynnt á Vísindavöku Úrval spennandi rannsóknaverkefna verður kynnt á Vísindavöku í ár, en hún verður í Háskólabíói, föstudaginn 28. september kl. 17-22.Sjá nánar http://www.rannis.is/visindavaka/frettir/nr/2786/

Helgina 5.-7. október ætlar ungmennaráð UMFÍ og 0% að hittast og eyða saman helginni á Laugum í Sælingsdal. Öll ungmenni á aldrinum 16-30 ára sem vilja hittast og skemmta sér án vímuefna eru velkomin. Til að kynna sér málin frekar og/eða skrá sig er hægt að hafa samband við: Sigríði í síma: 866-2961, sem7@hi.is eða Einar í síma: 697-4810, einar@nullprosent.is. Taka þarf fram: fullt nafn, aldur, símanúmer og netfang. Fæði, gisting og uppihald er þér að kostnaðarlausu! Hlökkum til að heyra í þér, Ungmennaráð UMFÍ og 0%

Á Hnappstaðatúni hefur verið sett upp útilistaverk sem er upplýstur kristall - bleikur á lit sem skín í haustmyrkrinu. Það er franska listakonan Delphine Perlstein sem á heiður af verkinu en hún dvaldi í Nes listamiðstöð í ágústmánuði. Lýsingu í verkið hannaði Hallbjörn Björnsson, rafvirkjameistari. Delphine stundaði nám við Sorbonne háskólann eða Svartaskóla eins og hann hefur um aldir verið nefndur á Íslandi, eftir að Sæmundur fróði var þar. Það kemur því kannski ekki á óvart að hún sæki merkingu í verk sín dýpra en virðist við fyrstu sýn. Í lýsingur sinni á verkinu segir Delphine: Þessi skúlptúr er byggður á gullnu formi fimmhyrningsins sem inniheldur hin gullnu reglu þríhyrningsins sem aftur var undirstaða stærðfræðireglu Fibonnacci. Fimmhyrningur er tákn fullkomnunar, lífs, fegurðar og ástar. Hann vísar stundum til Venusar, hinnar helgu kvenímyndar. Kristallarnir eru 7 sem er einnig heilög tala eins og við þekkjum frá sjö undrum veraldar. Sem steinn hefur kristallinn mátt hreinsunar á umhverfi sínu. Hann móttekur ljós og magnar það upp. Á hinu andlega sviði er kristallinn vörn og hefur hreinsunarmátt fyrir sálina og hjálpar okkur að ná markmiðum okkar. Hann er góður fyrir hugleiðslu og skarpskyggni. Hann gefur frá sér orku og raðar upp orkustöðvum mannsins. Hann er margbrotinn og fullkominn steinn. Ætlunin með gerð skúlptúrsins var að skila fallegri hugsun tengdri ást, fegurð, orku, heiðarleika og sannleika sem er meðvitað blandað saman í þeim tilgangi að hugleiða þau. Bleiki liturinn í verkinu er litur rósarinnar, tákn lífsins sem minnir á að lífið er verðmætt og við verðum að gæta þess vel. Kristalnum er stillt upp þannig að hann opnast eins og blóm og í grunninn er öll uppstilling verksins vísun í móður náttúru bæði sem kristallar og samlíking við blómkrónuna. Mér fannst einnig mjög áhugavert að stilla verkinu upp miðsvæðis á Skagaströnd og mynda þannig hlekk milli náttúru og menningar. Það er einnig gaman að sjá verkið í svon fallegu umhverfi.

Félagsstarf eldri borgara á Skagaströnd er hafið eftir sumarfrí. Vetrarstarfið hófst sl. fimmtudag í nýju rými sem gert hefur verið upp í félagsheimilinu Fellsborg. Starfið var dálítið á hrakhólum síðastliðinn vetur þar sem öll neðri hæð félgasheimilisins var tekin til endurbóta en þar hefur starfsemin verið undanfarin ár. Endurbæturnar voru fólgnar í að herbergi í suðurhlutanum voru öll sameinuð í einn sal með kaffiaðstöðu og geymslum og tvö rými í norðurhlutanum voru sameinuð fyrir bókasafn Skagastrandar. Nú er félagsstarfið sem sagt flutt inn í nýuppgert rými sem er bæði bjartara og rýmra en sú aðstaða sem áður hýsti starfið. Jafnframt félagsstarfinu er gert ráð fyrir að hægt sé að nýta aðstöðuna til fundahalda og reiknað með að Kvenfélag og Lionsklúbbur sem gáfu eftir herbergi sín muni nota salinn fyrir fundi og aðra starfsemi sína.