Togarinn Örvar kom í höfn á Skagaströnd sl. mánudag eftir rúmlega 5 sólarhringa siglingu frá Póllandi.Skipið fór í slipp í Gdyna í byrjun janúar og voru gerðar á því talsverðar breytingar. Skut skipsins var slegið út, fiskmóttaka stækkuð og klæðning á millidekki endurnýjuð. Örvar var einnig sandblásinn og málaður hátt og lágt og er nú hinn glæsilegasti. Má segja að það hafi verið gömlum Skagstrendingum mikið gleðiefni að sjá skipið málað í togaralitum Skagstrendings. Örvar fer á veiðar eftir uþb. 10 daga en nú er unnið að því að setja veiðarfæri um borð í skipið og ganga frá vinnslubúnaði á millidekki.

Hið árlega grímuball staðarins var haldið í Fellsborg fimmtudaginn 10. febrúar. Mættu þar margvíslegar furðuverur á öllum aldri og skemmtu sér vel. Verðlaun, fyrir bestu búningana, voru veitt í þremur aldursflokkum, þá var marserað og svo kötturinn sleginn úr tunnunni. Það er skólafélagið Rán sem stendur að grímuballinu með góðri aðstoð foreldra og kennara.

Námsstofan á Skagaströnd Nú er vorönn hjá þeim skólum sem eru með fjarnám. Fjarnámsnemendur eru farnir að mæta í Námsstofuna eftir jólafrí og áramótaannir. Tveir nýir nemendur hafa gert samning um aðgang að aðstöðunni eftir áramót. Enn skal ítrekað að í Námsstofunni er góð aðstaða til að stunda fjarnám, nokkrar tölvur og lesstofa. Nú er búið að tengja fjarfundabúnaðinn sem þýðir að nú er hægt að sitja kennslustundir í Námsstofunni. Þrír nemendur hafa nýtt sér það á nýju ári. Föstudaginn 18. febrúar kemur hingað ungur maður sem er að vinna lokaverkefni sitt við Háskólann í Kaupmannahöfn í rafmagnsverkfræði og tölvunarfræðum. Verkefni hans er unnið í samvinnu við Flugmálastjórn og er örsmár hluti af flugumferðarstjórnunarkerfinu á Atlandshafinu. Hann kemur hingað með sína tölvu og prentara, tengist kerfinu hér og nýtir sér fjarfundabúnaðinn til að vera í sambandi við Kaupmannahöfn og Reykjavík. Hann reiknar með að vera hér í 1-2 vikur. Við lítum á þetta sem tilraun og ef hún gefst vel og allt virkar eins og það á að gera geta aðrir fylgt í kjölfarið. Þriðjudaginn 8. febrúar hófst tilraunaverkefni Námsstofunnar og Trésmiðju Helga Gunnarssonar ehf. Helgi kemur inn á Námsstofuna með 1-2 starfsmenn með sér á morgnanna og er um 2 klst. Umsjónarmaður Námsstofunnar leiðbeinir þeim um Internetið, póstforrit, Exel, Word o.s.frv. allt eftir þörfum hvers einstaklings. Næst mætir Helgi föstudaginn 11. febrúar og síðan verður næsti dagur ákveðinn. Þriðjudaginn 22. febrúar verður fyrri hluti námskeiðs í AutoCAD í tölvuveri Höfðaskóla. Seinni hlutinn verður þriðjudaginn 15. mars. Fyrirtækið Snertill sem er viðurkenndur sölu- þjónustu- og kennsluaðili Autodesk og CADPOINT verður með námskeiðið. Námskeiðið er á vegum Námsstofunnar og á milli fyrri og seinni hluta verður hægt að koma í tölvur Námsstofunnar og æfa sig í verkefnum í AutoCAD eftir samkomulagi við umsjónarmann. Þeir sem vilja aðstoð eða nýta aðstöðuna í Námsstofunni á Skagaströnd er bent á að hafa samband við undirritaðan. Febrúar 2005 Umsjónarmaður Námsstofunnar á Skagaströnd Hjálmur Sigurðsson S: 8440985

Furðuverur dagsins sýndu ýmis skemmtileg tilþrif við söng og spil á öskudegi. Ungir Skagastrendingar fóru ótroðnar slóðir og bættu nokkrir upp sönginn með gítarspili. Íklæddir á ýmsa vegu mættu tónlistarmenn framtíðarinnar og létu sér ekki muna um að skemmta starfsfólki á hreppsskrifstofunni og hlutu að sjálfsögðu góðgjörning að launum. Grímuballið verður haldið í Fellsborg á fimmtudag milli kl. 19.00-21.00 og eru allir hvattir til að mæta í grímubúningum.

Kynning á námi við Háskólann á Akureyri Laugardaginn 12. febrúar nk. verður kynning á námsframboði Háskólans á Akureyri. Kynningin verður haldin í rannsóknar- og nýsköpunarhúsinu Borgum kl. 13:00 til 17:00. Boðið verður upp á kaffiveitingar og tónlistaratriði. Þeir sem hafa áhuga á að kynna sér starfsemi háskólans og skoða ný húsakynni að Borgum eru hvattir til að taka daginn frá fyrir öðruvísi laugardagsbíltúr. Dagskrá 13:30 – Kynning á auðlindadeild Gengið verður um rannsóknarstofur auðlindadeildar um leið og brautskráðir nemendur kynna nám við deildina. 14:00 – Kynning á félagsvísinda- og lagadeild Nemendur og starfsmenn kynna nám við félagsvísinda- og lagadeild. 14:30 – Kynning á heilbrigðisdeild Nemendur á 4. ári í hjúkrunarfræði og iðjuþjálfun segja frá reynslu sinni af námi við heilbrigðisdeild. 15:00 – Kynning á kennaradeild Nemendur á grunnskólabraut og leikskólabraut segja frá námi við kennaradeild. 15:30 – Tónlistaratriði Helena Guðlaug Bjarnadóttir, sópran syngur við undirleik Helgu Bryndísar Magnúsdóttur. 16:00 – Kynning á upplýsingatæknideild Deildarforseti og nemendur segja frá námi við deildina. 16:30 – Kynning á viðskiptadeild Nemandi á 2. ári og brautskráður nemandi kynna nám við deildina og alþjóðlegt verkefni sem unnið er að um þessar mundir. Nemendur og kennarar allra deilda verða á staðnum og svara fyrirspurnum á meðan opið er. Kemstu ekki??? Fyrir þá sem hafa ekki tök á að koma á þessum tíma vek ég athygli á námskynningu í Borgarleikhúsinu 5. mars nk. kl. 11 – 17. Sjá nánar á slóðinni: http://www.unak.is/template1.asp? pageid=1025&newsid=799

Það kom skemmtilega á óvart að Ingvar Jónsson, brottfluttur Skagstrendingur kom í heimsókn í íþróttahúsið færandi hendi. Var honum hugsað til æskunnar sem nú vex úr grasi á Skagastönd minnugur þess þegar hann ólst sjálfur þar upp að hluti af því er þátttaka í bolta og keppnisleikum. Færði hann húsinu keppnistreyjur og bolta til að nota við íþróttaiðkunn. Árni Geir húsvörður tók við gjöfunum og færi honum þakklæti Skagstrendinga fyrir þær. Ingvar er eigandi Nike-búðarinnar á Laugarveginum.

Undanfarin ár hefur það verið venja að nemendur í 9. og 10. bekk hafa farið í skólaferðalag til Danmerkur annað hvort ár. Síðastliðinn vetur barst ósk frá vinabæ okkar í Noregi, sem heitir Hönefoss, um gagnkvæm nemendaskipti. Var það einn bekkur í Hov ungdomsskole sem vill gjarnan koma til Íslands og kynnast landi og þjóð.Var það samþykkt og hafa nokkur samskipti verið milli nemenda síðan. Nú hefur verið ákveðið að norsku nemendurnir verði á Skagaströnd 24.-26. maí en að nemendur 9. og 10. bekkjar Höfðaskóla verði í Noregi 7.-12. júní. Munu þeir dvelja í Hönefoss 7.-9. júní en að öðru leyti hefur dagskráin ekki enn verið fullmótuð.

Þriðjudaginn 18. janúar sl. var haldinn fræðslufundur í Höfðaskóla á vegum foreldrafélags skólans. Fyrirlesari var Jón Páll Hallgrímsson, starfsmaður Regnbogabarna, sem eru landssamtök gegn einelti. Jón Páll skipti fyrirlestri sínum í tvennt. Í fyrri hlutanum ræddi hann eineltismál og aðgerðir gegn þeim en seinni hlutanum varði hann í forvarnir vegna vímuefnaneyslu. Um þrjátíu foreldrar sátu fundinn. Sama dag hitti Jón Páll nemendur 8.-10. bekkjar og ræddi við þau um sömu málefni. Fyrir þá sem áhuga hafa á að kynna sér starfsemi Regnbogabarna þá er heimasíðan www.regnbogaborn.is .

Um miðjan janúar barst nemanda í 1. bekk pakki frá Danmörku. Í sendingunni var lítill bangsi, að nafni Cinnabear. Hafði hann upphaflega verið sendur frá Michigan í Bandaríkjunum sl. haust og var skólaverkefni ungs nemanda þar. Tilgangurinn með verkefninu var að láta bangsann ferðast sem víðast um heiminn og biðja viðtakendur hans að senda fréttir og myndir í skólann í Michigan þar sem nemandinn er. Með þessu á að auka tengsl og víðsýni milli landa. Bangsinn hafði upphaflega farið til Hollands og þaðan til Danmerkur og kom svo hingað til Skagastrandar. Hér hefur hann m.a. heimsótt leikskólann og svo 1. bekk grunnskólans. Héðan fer bangsinn til Svíþjóðar og svo væntanlega til Frakklands áður en hann heldur heim á leið í byrjun apríl.

Eins og öllum er í fersku minni féllu niður rúmlega 30 kennsludagar í haust vegna verkfalls. Á fundi skólanefndar Höfðaskóla, 12. desember sl., var skipuð fjögurra manna nefnd til að koma með tillögur til sveitarstjórnar um úrbætur vegna þessa. Í nefndinni sátu skólastjóri, formaður skólanefndar og fulltrúar foreldraráðs og kennara. Voru þær tillögur sendar hreppsnefnd í árslok. Á fundi hreppsnefndar Höfðahrepps, þann 11. janúar sl., var samþykkt að veita skólastjóra Höfðaskóla heimild til að ráðstafa allt að 500 þús. kr. til að bæta nemendum elstu bekkjanna upp kennslutap vegna verkfallsins í haust. Einnig var lögð áhersla á að nýta alla daga sem best til kennslu. Á grundvelli þessarar samþykktar og og með hliðsjón af tillögum nefndarinnar hafa eftirfarandi ráðstafanir verið gerðar:  Prófdögum í annarlok, í febrúar og maí, og útivistardögum í maílok hefur verið fækkað og verður almenn kennsla í stað þess.  Æfingar fyrir árshátíð verða að hluta til utan hefðbundins kennslutíma, þ.e.a.s. færast aftar á daginn.  Kennsla verður 29. mars í stað starfsdags kennara.  Kenndir verða sex aukadagar í 10. bekk og 3 aukadagar verða í 8. og 9. bekk. Þar verða samræmdu-prófs greinarnar í forgrunni. Þessi kennsla fer fram á laugardögum og öðrum frídögum í apríl og maí Með þessum og öðrum aðgerðum hafa bæst við frá fjórum og upp í fjórtán dagar í kennslu þar sem áherslan er fyrst og fremst lögð á bóklegar greinar. Mestur ávinningurinn er á unglingastiginu. Er þess vænst að þessar aðgerðir vegi að hluta upp á móti því kennslutapi sem varð í haust.