Sigurvegarar í spurningakeppninni Drekktu betur síðasta föstudagskvöld voru þrír Elva Dröfn, María Jóna og Hrefna Dögg. Spyrjandi var Írena Rúnarsdóttir sem stóð sig með afbrigðum vel þó ekki hafi hún staðið við gefið loforð um léttar spurningar. Írena var með fjölbreyttar spurningar og raunar frekar úr dægurhlið tilverunnar en hitt. Hins vegar vildu svörin oftast vefjast fyrir þátttakendum og gramdist mörgum það mikið og var nokkuð um frammíköll og læti. Írena stjórnaði hins vegar salnum með harðri hendi og lét engan komast upp með derring. Þannig eiga stjórnendur að vera. Hér á eftir eru spurningar og rétt svör: Kristján Hjartarson afi minn á skírnarsálm sem er í sálmabókinni númer hvað er hann? Svar: 254 Mörg gömul hús á Skagaströnd eiga sér nafn og er mitt hús eitt af þeim hvað heitir það? Svar: Hjarðarholt . Hvaða ár og hvaða dag fór fór kántrýútvarpið fyrst í loftið? Svar: 14 nóvember 1992. Eins og allir vita erum við með tvö lungu en þau eru ekki alveg eins hver er munurinn? Svar: Það hægra er með þrjú lungnablöð en það vinstra aðeins tvö. Hver samdi bækurnar Þjóð bjarnarins mikla og Dalur hestanna ásamt fleiri bókum? Svar: Jean M. Auel. Ef ég set tvo bolla af hveiti tvo bolla af salti og einn af volgu vatni í skál og hræri það saman hvað er ég þá búin að búa til? Svar: Trölladeig Georg Lazenby, Timothy Dalton og Pierce Brosnan eiga það sameiginlegt að þeir hafa allir leikið sömu persónuna hver er það? Svar: James Bond. Í skjaldarmerki Íslands eru fjórir landvættir hverjir eru þeir? Svar: Naut örn dreki og risi. Í sögunni Sitjið guðs englar segir frá systkinum sem alast upp hjá mömmu sinni ömmu og afa. Pabbinn er oftast í burtu vegna vinnu hvað starfar pabbinn og hver skrifaði söguna? Svar: Pabbinn er sjómaður og Guðrún Helgadóttir skrifaði bókina . Ef spurt er um uppruna hver af þessum fjórum passar þá ekki með hinum og hvers vegna Batman , ET, Stitch og Súperman ? Svar: Batman hann er jarðarbúi en hinir koma allir frá öðrum hnöttum . Hversu margir eru hryggjarliðirnir í okkur ? Svar: þeir eru 33 ,7 hálsliðir, 12 brjóstliðir ,5 lendarliðir, 5 spjaldliðir og 4 rófuliðir . Emelio Estevez er nokkuð frægur leikari hann á bróður og pabba sem eru líka frægir leikarar en bera ekki sama ættarnafn hverjir eru þeir ? Svar: Charlie og Martin Sheen . Þegar þessi hljómsveit sló í gegn með fyrsta lagið sitt olli það hneyksli með glaðlegu lagi sem hét eftir gamalli orrustu þar sem þúsundir manna létu lífið hvaða hljómsveit er þetta og hvað heitir lagið ? Svar: Abba og Waterloo. Í myndinni Thelma and Louise má sjá ungan leikara í aukahlutverki sem síðar átti eftir að slá rækilega í gegn hver er hann ? Svar: Brad Pitt. Á norðanverðum Spákonufellshöfða er stapi hvað heitir hann ?Svar: Arnarstapi. Poppgoðið Mikael Jackson lést fyrr á þessu ári hvaða dag var það ? Svar: 25 júní . Hvaða ár var stjórnsýsluhúsið hér á Skagaströnd tekið í notkun ? Svar: 1986 Hvað heitir fyrsta ljóðabókin sem Rúnar Kristjánsson gaf út ? Svar: Ljóð frá Skagaströnd . Nú í september lést leikarinn Patrick Swayze af völdum krabbameins aðeins 57 ára að aldri hvernig krabbamein var það sem dró hann til dauða ?Svar: krabbamein í brisi . Hverjir sátu í fyrstu stjórn Skagstrendings ? Svar: Sveinn Ingólfsson, Karl Berndsen ,Guðmundur Lárusson,Guðmundur Jóhannesson og Kristján Hjartarson . Lagið Kokomo með Beach boys er úr vinsælli kvikmynd hvaða mynd er það ? Svar: Coktail. Hvað heitir mótleikona Patrick Swayze í kvikmyndinni Dirty dancing ? Svar: Jennifer Gray. Hvaða ár var fyrsta verkalýðsfélagið stofnað á Skagaströnd ? Svar: 1907. Í kvikmyndinni ET má sjá barnunga leikkonu sem í dag er orðin stórstjarna hvað heitir hún ?Svar: Drew Barrymore. Hvaða ár kom fyrsti sjúkrabíllinn til Skagastrandar ? a.1984, b 1987, eða c 1989. Rétt svar 1987 Hvað heitir nýjasti diskurinn með hljómsveitinni Mannakorn ? Svar: Von Árið 1992 gaf hljómsveitin Soul asylum út disk með lagi sem vakti mikla athygli meðal annars fyrir það að í myndbandi lagsins voru birtar myndir af týndum börnum sem varð svo til þess að eithvað af þeim fannst hvað heitir lagið ? Svar: Runaway train Hver var fyrsti lærði sjúkraflutningamaðurinn á Skagaströnd ? Svar: Jónas Jónasson ( í Réttarholti ) Hver lék aðstoðarflugmann Tom Cruise í myndinni Top gun ? Svar: Antony Edwards Hver lék aðalhlutverkið í myndinni La Bamba ? Svar: Lou Diamond Phillips.

Tónleikar í Kántrýbæ: Maggi Eiríks, Pálmi Gunnars, Ellen Kristjáns, Gulli Briem og Eyþór Gunnars. Nýju lögin af Von og allar gömlu perlurnar. Miðaverð aðeins 1.000 krónur. Forsala á fimmtudag frá kl. 13-19 í síma 847 66 22. Tónleikarnir eru styrktir af Minningarsjóðnum um hjónin frá Garði og Vindhæli.

Fjórtán nýir listamenn koma nú til starfa hjá Nes listamiðstöð á Skagaströnd. Tæplega eitt og hálft ár er nú síðan fyrstu listmennirnir komu og síðan hafa um 160 manns komið til Skagastrandar til að sinna listsköpun sinni. Fjölmargir þeirra halda enn góðu sambandi við Nes listamiðstöð, m.a. í gegnum Facebook. Margir þeirra hafa eignast góða vini á Skagaströnd og jafnvel er dæmi um enn dýpra samband ... Víst er að Skagstrendingar bjóða hina nýju listamenn velkomna og vona að dvölin verði þeim sem ánægjulegust. Listamenn októbermánaðar eru þessir: Hannah Casey, myndlistamaður frá Írlandi Princess Ayelotan, rithöfundur frá Frakklandi Maurice Orr (John Will), myndlistmaður frá Írlandi Caroline Lioré, ljósmyndari frá Frakklandi Renata Padovan, brasilískur listamaður sem vinnur ljósmyndir og vídeó Oliver Gardiner, videolistamaður frá Englandi Bendel Hydes, málari frá Bandaríkjunum Di Ball, vinnu blandaða list og er frá Ástralíu Louisa Conrad, myndlistarmaður frá Bandaríkjunum Lucas Farrell, rithöfundur frá Bandaríkjunum Adrian Buitenhuis, kanadískur listamaður sem vinnur video/myndlist Sue Gordon frá Kanada, vinnur paint/print Laura Hensser, vinnur með ljósmyndir og kemur frá Englandi Ciara O’Hara, myndlistarmaður frá Írlandi

Textílsetur Íslands í Kvennaskólanum Blönduósi býður upp á ýmsa viðburði í október. Prjónakaffi verður haldið þriðjudaginn 6.okt. kl. 20.00. Storkurinn, hannyrðaverslun, kynnir þá vörur og námskeið. Verslunin hefur sérhæft sig í m.a. bresku gæðagarni, efnum og bókum og hönnun frá Kaffe Fasset, sjá nánar á vefsíðunni www.storkurinn.is. Námskeið verða á boðstólnum fyrir áhugasama.  Silkimálun verður þriðjudaginn 6. og fimmtudaginn 8. október kl. 19.30 til 22.00.  Þar kennir Inese Elferte málun á silki og bómullarefni. Kennt er að nota  einfaldar aðferðir til að mála á silki og önnur efni;  slæður, fataefni, myndir, málað á boli, koddaver o.s.frv. Námskeiðið er tilvalið fyrir kennara því tæknina má auðveldlega nýta í kennslu í grunnskóla. Haustnámskeið, námskeiðaröð verður laugardaginn 27. og þriðjudaginn 27. október. Ýmis námskeið verða á boðstólnum og geta nemendur raðað saman stundatöflu eftir því hvar áhuginn liggur. Prjónanámskeið;  prjóntækni, EZ listasmiðja, peysa prjónuð ofan frá, mósaíkprjón, tveir hlutir prjónaðir á einn prjón. Hekl; „venjulegt hekl”, rússneskt hekl, frjálst hekl. Gimb og spuni á halasnældu Athugið að fullt er á sum námskeiðin en enn er möguleiki að komast inn á stök námskeið.  Nánari upplýsingar: www.textilsetur.is, textilsetur@simnet.is og í síma 894-9030.

Lögreglubíll og fólksbíll eru óökufærir eftir árekstur sem varð á Strandgötu á Skagaströnd í morgun. Tildrögin voru þau að bílarnir mættust við hraðahindrun en hún er tvískipt. Ökumaður Toyotu fólksbíls ætlaði að komast hjá því að aka yfir hraðahindranirnar og beygði yfir á vinstri vegarhelming, á milli þeirra. Ekki tókst honum betur til en svo að hann lenti beint framan á lögreglubíl sem þarna var, því sem næst kyrrstæður. „Það er alveg óskiljanlegt að búa til hraðahindrun sem gefur kost á því að ökumenn geti komist hjá þeim með því að aka yfir á rangan vegarhelming,“ segir Vilhjálmur Stefánsson, lögreglumaður á Blönduósi, en hann var ökumaður lögreglubílsins. „Hvers vegna að hafa hraðahindrun ef ekki þarf að aka á hana? Meira að segja bílar sem komu þarna að eftir áreksturinn sveigðu á milli hraðahindrananna fyrir framan augun á okkur,“ segir Vilhjálmur og bætir því við að lögreglan ætli að spyrjast fyrir um tilganginn með þessu hjá sveitarstjóra Skagastrandar. Skemmdir á lögreglubílnum voru ekki miklar en nægar til að hann var óökufær, líklega er vatnskassinn ónýtur.   

Skagstrendsku norðurljósin léku við hvern sinn fingur síðasta laugardagskvöld og náðu greinilegu sambandi við hið yfirnáttúrlega fjall Spákonufell. Þau tindruðu og bröguðu í ótal litum Íranum Patrick Hogan, sem er einn af listamönnum á Nes listmiðstöð, var litið í gegnum auga myndavélarinnar og tók meðfylgjandi myndir. Myndirnar eru frábærar og tala sínu máli. Fjórar þeirra sýna norðurljósin í leik við Spákonufell. Tvær myndir eru teknar þegar litatrafið leið yfir Húnaflóa. Gamlar sagnir herma að þegar norðuljósin tindra á suðurhimni og hlaupa hratt yfir himinhvolfið veit það á sunnanátt en glampa þau á norðurhimni er kuldatíð í vændum. Víst er að frá laugardegi hefur verið frekar kalt, að minnsta kosti við Húnaflóa. Smellið á myndirnar til að sjá þær stærri. Patrick Hogan eru hér með færðar bestu þakkir fyrir að leyfa birtingu á myndunum.

Vatnslaust verður á eftirfarandi götum á Skagaströnd frá kl. 8 og fram eftir degi:  • Hólabraut • Neðri hluti Bogabrautar • Efri hluti Fellsbrautar Truflanir á vatnsrennsli gætu þó orðið víðar.

Vatnslaust verður á Skagaströnd föstudaginn 25. september 2009. Ástæðan er viðgerð á vatnslögn bæjarins. Ekki er hægt að segja til um hversu lengi viðgerðin mun standa en vonir standa til að það verði ekki lengi.

Þátttakendur í spurningakeppninni Gettu betur síðsta föstudagskvöld létu spyrilinn, Steindór R. Haraldsson, vel finna fyrir sér. Samkvæmt reglum keppninna má draga þekkingu og hæfni spyrilsins í efa og var nýttu menn sér það svikalaust. Fyrir vikið varð þetta ein skemmtilegasta spurningakeppnin frá upphafi enda Steindór með orðheppnari mönnum og leyfði engum að eiga neitt inni hjá sér. Taka verður fram að spyrillinn er einnig dómari og alvaldur og því átti Steindór alls kostar við óeirðaseggi í hópi þátttakenda. Þó verður að segjast eins og er að spurningar Steindórs voru í erfiðari kantinum. Yfirleitt hefur þurft 20 til 24 rétt svör til að sigra en sigurvegararnir, Árdís Indriðadóttir og Ólafía Lárusdóttir, náðu aðeins 16 stigum. Segir það sína sögu um spurningarnar. Um þrjátíu manns tóku þátt að þessu sinni. Ár er nú liðið frá því að Kántrýbær tók að bjóða upp á þessa nýbreytni í bæjarlífinu og væntanlega verða þau enn fleiri. Framvegis verða spurningar og svör úr síðustu keppni birtar hér á vef sveitarfélagsins. Það er gert til að sýna þeim sem ekki mæta hversu skemmtilega keppnin í raun og veru er. Eins geta þeir sem taka að sér hlutverk spyrils séð hvernig semja má spurningar. Spurningar vegna Gettu betur 18. september 2009 1. Hvert var upphaflegt nafn Páls postula?  Svar: Sál. 2. Hvers sonur var Halldór Laxnes og hvað hét hann að miðnafni.  Svar: Guðjónsson, Kiljan  3. Hvað er Vítabikar?  a. Bikar sem vinnst í fótbolta með vítaspyrnu  b. Bikar sem piltar í Lærða skólanum urðu að drekka úr vegna inngöngu í skólann. c. Bikar með götum í efri hluta, mjög vandasamt er að drekka úr honum án þess að hella niður.  d. Getnaðarvörn.        Svar: C  4. Eftir hvern er sagan Leggur og skel?  Svar: Jónas Hallgrímsson. 5. Landnáma er safnrit um landnámsmenn, forfeður þeirra og afkomendur. Hvað voru landnámsmennirnir margir?  a. 430 b. 97 c. 748 d. 2130 Svar: 430 6. Hver var biskup yfir Íslandi þegar Jóhannes Páll II páfi kom hingað í heimsókn. Svar: Hr. Pétur Sigurgeirsson. 7. Hvað er Sólselja?  Svar: Dill. 8. Linda Eastman McCartney átti eitt barn þegar hún kynntist Paul McCartney en hvað áttu þau mörg börn saman?  Svar: Þrjú 9. “Vér mótmælum allir” er vinsæl setning um þessar mundir. Hvaða ár var þetta sagt og við hvaða tækifæri  Svar: Þjóðfundurinn 1851. 10. Hvað heitir hæsta fjall Afríku.  Svar: Kilimanjaro. 11. Hver er efnaformúla vatns?  Svar: H2O. 12. Hvar og hvenær verða næstu Ólympíuleikar haldnir?  Svar: London 2012. 13. Hvernig er þakið á Vindhæli á lit?  Svar: Ómálað. 14. Hversu mörg ár hefur Magnús B. Jónsson verið sveitarstjóri á Skagaströnd?  Svar: 19 ár. 15. Hvernig stóð á því að Edison betrum bætti ljósaperuna?  Svar: Hann kveikti á perunni. 16. Botnið málsháttinn: “Sú er ástin heitust sem ...“  Svar: Sú er ástin heitust sem bundin er meinum. 17. Skáldsagan “Gamli maðurinn og hafið” var skrifuð á Kúbu 1951. Hver er höfundurinn?  Svar: Ernest Hemingway. 18. Hvað heitir Japan á japönsku?  Svar: Nippon. 19. Hvað heitir Sýslumaður Húnvetninga?  Svar: Bjarni Stefánsson 20. Deildu í 30 með 1/3 og bættu 10 við. Hver er niðurstaðan?  Svar: 100, (30  deilt með 1/3 = 90) 90+10=100. 21. Hver er fituprósenta nýmjólkur í bláu fernunum?  Svar: 3,9%  22. Það eru ekki margir sem vinna Óskarsverðlaun tvö ár í röð fyrir aðalhlutverk, það gerði þó góður leikari 1993 og 1994. Önnur myndin er borgarnafn í BNA, hin minnir viðinn í þessu húsi. Hverjar eru þessar myndir og hver er leikarinn?  Svar: Philadelfia og Forrest Gump. Tom Hanks 23. Hvað er síminn hjá lögreglunni á Blönduósi?  Svar:  455 2666 24. Hvað hét fyrsta verslunin sem Hallbjörn Hjartarson stofnaði á Skagaströnd og hvers konar verslun var það?   Svar: Verslunin Vík. Nýlenduvöruverslun 25. Hvernig er unnt að sjóða egg í fimmtán mínútur ef það eina sem hægt er að mæla tímann með eru tvö stundaglös, annað tæmist á sjö mínútum og hitt á ellefu mínútum?  Svar: Eggið er sett í sjóðandi vatn og bæði stundaglösin eru sett af stað. Eftir 7 mínútur er minna stundaglasinu snúið við og síðan aftur þegar stærra glasið tæmist. (Þá eru 11 mínútur liðnar og minna glasið búið að mæla fjórar mínútur). Þegar minna glasið tæmist eru komnar 15 mínútur. 26. Á 4 árum eru 20 mánuðir með 31 dag hver. Hversu margir mánuðir á þessum 4 árum hafa 28 daga?  Svar 48, hlýtur að vera. 27. Hversu margar skepnur af hvoru kyni tók Móses með sér um borð í örkina?  Svar: Móses var ekki í þessum buisness, Það var Nói! 28. Hve mörg 2.(tveggja) krónu frímerki eru í tylft?  Svar: 12, það eru tólf í tylft.   29. Er löglegt á Íslandi að giftast systur ekkju sinnar?   Svar:  Nei, látnir mega ekki giftast!   30. Hvað er skoffín?  Svar: Afkvæmi tófu og kattar og er kötturinn móðir.

Sveitarstjórn Skagastrandar hefur samþykkt reglugerð um kattahald sem Umhverfisráðuneytið hefur staðfest. Í reglugerðinni segir m.a.: Sveitarstjórn er heimilt að veita lögráða einstaklingum, sem búa í sveitarfélaginu leyfi til kattahalds með ákveðnum skilyrðum. Leyfið er bundið við nafn og heimilisfang viðkomandi og er ekki framseljanlegt. Leyfið er einnig bundið við þann kött sem það er gefið út fyrir. 
 Allir heimiliskettir á Skagaströnd skulu skráðir á skrifstofu sveitarfélagsins gegn greiðslu skráningargjalds og þar fá eigendur heimiliskatta afhenta númeraða plötu með skráningarnúmeri kattarins, sem alltaf skal vera í ól um háls dýrsins. 
 Óheimilt er að láta kött, eldri en 3ja mánaða, dvelja lengur en einn mánuð á heimili án þess að sótt sé um leyfi fyrir hann. Ekki er leyfilegt að hafa fleiri en þrjá ketti eldri en þriggja mánaða á sama heimilinu. Umsókn um leyfi til kattahalds skal skila inn á skrifstofu sveitarfélagsins á þar til gerðum eyðublöðum. Með undirritun umsóknar skuldbindur umsækjandi sig til að hlíta í einu og öllu fyrirmælum samþykktar um kattahald. Sveitarstjóri eða fulltrúi hans synjar eða gefur út umbeðið leyfi.“ Gjaldskrá fyrir kattahald hefur sömuleiðis verið ákveðin og er árlegt leyfi til kattahalds 1.500 kr. en aukagjald fyrir týnt merki 1.000 kr. Framangreind ákvæði um kattahald hafa þegar tekið gildi og því er skorað á kattaeigendur að skrá ketti sína hið fyrsta og merkja þá með sérstökum merkjum sem afhent eru við skráningu. Sömuleiðis eru hundaeigendur áminntir um skráningu séu hundar þeirra ekki þegar á skrá. Reglulega þarf að ganga í að eyða villiköttum. Til að tryggja að heimiliskettir séu ekki teknir í misgripum þarf að merkja þá að öðrum kosti gætu þeir verið álitnir villikettir og meðhöndlaðir sem slíkir. Skagaströnd 16. september 2009 Fyrir hönd sveitarstjórnar Sveitarstjóri